Avtomobil logistika meneceri

Vəzifənin məqsədi

Xaricdən idxal olunan avtomobillərin, o cümlədən şirkətin brendləri üzrə nəqliyyat daşımalarının vaxtında, təhlükəsiz və iqtisadi cəhətdən səmərəli təşkilini təmin etmək; gündəlik logistika əməliyyatlarını, daşıyıcılarla əlaqələri və çatdırılma prosesini tam koordinasiya etmək.

Əsas vəzifə və öhdəliklər

Planlaşdırma: satış komandaları tərəfindən təqdim edilən VIN siyahıları, prioritetlər, avtomobillərin yüklənməyə hazırlıq statusu və tələb olunan stok tarixləri əsasında aylıq, həftəlik və operativ daşınma planları hazırlamaq.

Daşınmaların idarə olunması: marşrutları, yükləmə tarixlərini, avto­vozların tutumunu, reyslərin müddətini və ardıcıllığını nəzərə alaraq nəqliyyat vasitələrini bölüşdürmək; plan-fakt fərqlərinə gündəlik nəzarət etmək.

Daşıyıcılarla koordinasiya: şirkətin öz avto­vozları və üçüncü tərəf daşıyıcılarla işləri təşkil etmək; yükləmə, yola düşmə, sərhəd keçidi və təhvilvermə mərhələlərini izləmək.

Avtopark və sürücülər: müvafiq səlahiyyət çərçivəsində avto­vozların istifadəsini, sürücülərin reys qrafiklərini və əməliyyat hazırlığını əlaqələndirmək; texniki və sənəd problemlərini vaxtında aidiyyəti bölmələrə yönləndirmək.

Risklər və tənzimləmə: sərhəd, gömrük, tranzit və icazə tələblərində dəyişiklikləri, növbələri və marşrut risklərini əvvəlcədən yoxlamaq; sürücülər, daşıyıcılar və müvafiq tərəflərlə məlumatları dəqiqləşdirmək; alternativ həllər hazırlamaq.

Sənədləşmə: beynəlxalq daşınmalarla bağlı nəqliyyat sənədlərinin, VIN uyğunluğunun, yükləmə siyahılarının və təhvil-təslim təsdiqlərinin düzgünlüyünü koordinasiya etmək; gömrük rəsmiləşdirilməsi üzrə məsul komandalarla işləmək.

Xərc və büdcə: marşrut və reys üzrə gözlənilən nəqliyyat xərclərini, daşıyıcı tariflərini və əlavə ödənişləri planlaşdırmaq; büdcə ilə faktiki xərclərin fərqlərini izah etmək və maliyyə şöbəsinə ödəniş proqnozlarını təqdim etmək.

Hesabatlılıq və eskalasiya: hər bir VIN və reys üzrə status, gözlənilən çatdırılma tarixi, gecikmə səbəbləri və düzəldici tədbirlər haqqında aktual məlumat vermək; kritik riskləri dərhal rəhbərliyə və aidiyyəti kommersiya komandalarına bildirmək.

Təkmilləşdirmə: marşrutların yoxlanılması, ehtiyat daşıyıcı imkanları, standart iş prosedurları və performans göstəriciləri vasitəsilə logistika proseslərini davamlı inkişaf etdirmək.

Səlahiyyətlər və əməkdaşlıq

Satış, maliyyə, gömrük, təchizat, servis və digər aidiyyəti strukturlardan planlaşdırma üçün zəruri məlumatları tələb etmək və qarşılıqlı fəaliyyət göstərmək.

Təsdiqlənmiş büdcə və səlahiyyət limitləri daxilində daşıyıcılara operativ tapşırıqlar vermək, reyslərin icrasını izləmək və alternativlər təklif etmək.

Əlavə xərc, kritik gecikmə və ya marşrut dəyişikliyi tələb edən qərarları təsdiq üçün səlahiyyətli rəhbərliyə təqdim etmək.